ప్రభుం ప్రాణనాథం విభుం విశ్వనాథం

 ప్రభుం ప్రాణనాథం విభుం విశ్వనాథం

జగన్నాథనాథం సదానందభాజామ్ |

భవద్భవ్యభూతేశ్వరం భూతనాథం

శివం శంకరం శంభుమీశానమీడే || ౧ ||

గళే రుండమాలం తనౌ సర్పజాలం

మహాకాలకాలం గణేశాదిపాలమ్ |

జటాజూటగంగోత్తరంగైర్విశాలం

శివం శంకరం శంభుమీశానమీడే || ౨ ||

ముదామాకరం మండనం మండయంతం

మహామండలం భస్మభూషాధరం తమ్ |

అనాదిం హ్యపారం మహామోహమారం

శివం శంకరం శంభుమీశానమీడే || ౩ ||

వటాధోనివాసం మహాట్టాట్టహాసం

మహాపాపనాశం సదాసుప్రకాశమ్ |

గిరీశం గణేశం సురేశం మహేశం

శివం శంకరం శంభుమీశానమీడే || ౪ ||

గిరింద్రాత్మజాసంగృహీతార్ధదేహం

గిరౌసంస్థితం సర్వదా పన్నగేహమ్ |

పరబ్రహ్మబ్రహ్మాదిభిర్వంద్యమానం

శివం శంకరం శంభుమీశానమీడే || ౫ ||

కపాలం త్రిశూలం కరాభ్యాం దధానం

పదాంభోజనమ్రాయ కామం దదానమ్ |

బలీవర్దయానం సురాణాం ప్రధానం

శివం శంకరం శంభుమీశానమీడే || ౬ ||

శరచ్చంద్రగాత్రం గణానందపాత్రం

త్రినేత్రం పవిత్రం ధనేశస్య మిత్రమ్ |

అపర్ణాకళత్రం సదాసచ్చరిత్రం

శివం శంకరం శంభుమీశానమీడే || ౭ ||

హరం సర్పహారం చితాభూవిహారం

భవం వేదసారం సదా నిర్వికారమ్ |

శ్మశానే వసంతం మనోజం దహంతం

శివం శంకరం శంభుమీశానమీడే || ౮ ||

స్తవం యః ప్రభాతే నరశ్శూలపాణేః

పఠేత్ స్తోత్రరత్నం త్విహప్రాప్యరత్నమ్ |

సుపుత్రం సుధాన్యం సుమిత్రం కళత్రం

విచిత్రైస్సమారాధ్య మోక్షం ప్రయాతి || ౯ ||